I lindur dhe i rritur në Prishtinë, ku përfundoi shkollimin fillestar dhe të mesëm. Ai studioi mjekësinë e përgjithshme gjithashtu në Prishtinë dhe e përfundoi specializimin në urologji në Beograd në vitin 1994.

Në vitin 1998, fitoi titullin magjistër i shkencave mjekësore me temën 'Gjendjet urgjente te kanceri i prostatës'. Ka marrë pjesë në trajnime të shumta profesionale në urologji në Turqi, Zvicër dhe Gjermani.

Për një kohë të gjatë ka qenë anëtar i kryesisë së Shoqatës së Urologëve të Kosovës, nënkryetar i Shoqatës së Urologëve dhe ushtrues i detyrës së kryetarit të Shoqatës së Urologëve të Kosovës.

Ai është autor dhe bashkëautor i shumë punimeve shkencore dhe autor i dy kapitujve në librin për kancerin e prostatës. Ka marrë pjesë në shumë kongrese dhe tubime të tjera shkencore në mbarë botën si ligjërues, moderator i sesioneve dhe pjesëmarrës në tubime shkencore.

Ka qenë promotor i edukimit të brezave të rinj në urologji, duke ndihmuar në formimin e tyre profesional, duke i ushtruar në disiplina të ndryshme urologjike dhe duke u mundësuar edukime jashtë vendit në klinika prestigjioze, si dhe duke marrë pjesë në punëtori të ndryshme profesionale të organizuara nga ekspertë ndërkombëtarë.

Gjatë karrierës së tij të gjatë profesionale, ai ka udhëhequr zbatimin e disa metodave të reja urologjike në Kosovë. Ai ka marrë pjesë në shumë aktivitete sociale dhe bamirëse vullnetare.

Ai flet dhe shkruan rrjedhshëm në gjuhët shqipe, turke dhe serbo-kroate. Ai gjithashtu zotëron mirë gjuhën angleze.

Ai është i punësuar në Qendrën Klinike Universitare të Kosovës në Klinikën e Urologjisë. Po ashtu punon në spitalin special 'Lindja' si ekspert i urologjisë pranë këtij spitali.